Lærarrettleiing trinn 3
Det er fleire måtar å teste hypotesar på. Intervju, spørjeskjema, observasjon, forsøk og informasjonssøk er undersøkingar som ofte blir brukte i eit Nysgjerrigper-prosjekt. Mange reiser på ekskursjonar for å finne ut meir, eller spør forskarar og andre fagfolk.
Bruk tid saman med elevane til å tenkje gjennom kva type informasjon de treng og kva undersøkingar som eignar seg best.
Nyttige førebuingar
Før elevane skal ut i felt og utføre eksperiment, telje, måle, fotografere, observere, snakke med andre, spørje og grave, kan det vere nyttig å trene litt i forkant.
- Skal elevane gjere forsøk eller eksperiment? Gå gjennom dei ulike faktorane som kan påverke forsøket, slik som utstyr og måleteknikkar.
- Skal elevane ringje til nokon? Øv på å gjennomføre ein telefonsamtale, til dømes det å presentere seg og å forklare kva ein vil.
- Skal elevane intervjue nokon? Øv på å intervjue kvarandre. Ta ein ekstra sjekk av opptaksutstyr eller øv på å notere frå eit intervju.
- Skal elevane sende brev eller e-post? Lær korleis ein skriv slike førespurnader, formelle eller uformelle.
- Skal elevane observere? Lag observasjonsskjema og tren på å bruke det.