Heilt sidan plasten vart funnen opp, har vi menneske kasta plast i havet. Plasten rotnar aldri. Derfor blir det meir og meir plast i sjøen. All denne plasten kan vere livsfarleg for sjødyr.
Nederlendaren Boyan Slat vil gjere noko med dette problemet. Han har funne opp eit slags havreinske-system. Ein kjempelang flytande vegg. Veggen stikk 1,5 meter under vassflata. Fisk og sjødyr kan symje under. Men flytande plast blir fanga opp av veggen. Ovanfrå ser veggen ut som ein diger «V». Havstraumane skal skyve plasten mot midten av denne V-en. Her skal plasten samlast opp av ei plattform med eit slags transportband. Så kan plasten fraktast til land og brukast på nytt til andre ting.
Testar teknologien
Før han byggjer den kjempelange veggen, må Slat teste at teknologien faktisk fungerer. Til dette brukar han ein prototyp. Det er ein modell som fungerer akkurat slik den ferdige veggen skal gjere. Men modellen er mykje kortare. Derfor er han raskare og billigare å byggje. Slat har testa modellen utanfor kysten av Nederland. Der har modellen fått grundig juling av vind og sjø. No må teknologien forbetrast før han kan testast vidare.
100 meter lang vegg
Den første veggen er 100 meter lang. Men Slat tenkjer mykje større. Han vil byggje ein 100 kilometer lang reinsevegg. Slik ønskjer han å rydde opp i den største flytande søppelplassen i verda, "The Great Pacific Garbage Patch". Klarer han det, vil det vere gode nyheiter for alle som elskar sjøen. Både for menneske og dyr.