At nokon tissar når dei badar, er inga hemmelegheit. Men kor mykje tiss er det eigentleg i eit symjebasseng?
Forskarane har prøvd å finne ein god metode for å måle kor mykje urin det er i eit basseng. Det er ikkje så lett. Mange av stoffa som finst i urin, blir borte når dei kjem ut i vatnet.
Kunstig søting
Forskarar i Canada meiner dei har funne ein god løysing. Nemleg å måle mengda av det kunstige søtingsstoffet E950. Dette søtingsstoffet blir ikkje brote ned. Dermed kan ein måle kor mykje ein person i gjennomsnitt har av E950 i urinen.
Så sjekkar ein kor mykje E950 som er i vatnet i vasskrana, og kor mykje som er i symjebassenget. Og vips, så kan ein rekne ut omtrent kor mykje urin bassenget inneheld.
Mange liter urin
Svaret vil du kanskje ikkje vite? Forskarane rekna ut at det i gjennomsnitt var 30 liter urin i eit offentleg symjebasseng! Til trøst: I eit 25 meter langt basseng er det ofte minst 1250.000 liter vatn!