Best med sukker på

Vi menneske synest ofte at maten blir betre med sukker på, og det gjer faktisk mange av bakteriane òg. Med litt søtstoff kan vi til og med få dei til å ete plast!

sukker, sukkerbit, søt, søtt

Det er i grunnen ganske lurt, sidan bakteriane bryt ned avfall, og ein femtedel av alt søppelet i verda faktisk er laga av plaststoff. Slike materiale er sette saman av kjempelange kjeder av molekyl, og bakteriane i naturen må begynne å gnage i den eine enden. Dermed blir plasten liggjande i årevis før bakteriane greier å bryte han ned.

No har indiske forskarar greidd å lage bitte små kjemiske fiskekrokar på dei lange plastkjedene. På desse går det an å hekte ørsmå sukkermolekyl. Slik har det seg at bakteriane begynner å gomle i veg på sukkeret så snart dei får sjansen. I same slengen jafsar dei hol på dei lange molekylkjedene, og bryt dei opp i passelege munnfullar for andre nedbrytarar.

Dermed kan plastposar og tomme saftflasker begynne å rotne berre etter nokre dagar på fyllinga. Dersom dette verkar så godt som forskarane trur, skal du ikkje sjå bort frå at du kan finne sukkerplast i butikkane om nokre år.

Publisert i Nysgjerrigper 2, 2003