5500 år gammal mote

01. jun 2017 06:00

Korleis var moten for over 5000 år sidan? Sjå den eldste kjolen i verda.

Den eldste kjolen i verda blir kalla Tarkhan-kjolen og er mellom 5100 og 5500 år gammal. Han vart funnen i ei egyptisk grav og er det eldste vovne klesplagget vi veit om. Kjolen er voven av lin. Det er veldig få klesplagg laga av plantefibrar eller dyreskinn som ikkje blir øydelagde av aldring. Og det er svært sjeldan å finne slike plagg som er meir enn 2000 år gamle.

Kjole

Tarkhan-kjolen er det eldste vovne plagget vi veit om. Kjolen er voven av lin. (Foto: Petrie Museum of Egyptian Archaeology/UCL) 

Dyktig handverk

Kva kan Tarkhan-kjolen fortelje oss? Kjolestoffet er vove av tynne, fine fibrar. Tøyet er klipt til og formsydd med vakre saumar, og delar av stoffet har fine foldar. Det fortel at kjolen er laga av ein svært dyktig handverkar. Slike spesialistar finst vanlegvis i større, velståande samfunn, og det var nok berre dei rike som hadde råd til å skaffe seg slikt eit fint plagg. I egyptiske gravkammer er det teikningar av overklassefolk med slike kjolar på. På lista over gjenstandar dei tok med seg i grava, står teiknet for "kjole", saman med andre nødvendige ting, som mat og sminke. Så dei hadde nok tenkt å pynte seg i livet etter døden!

Publisert i Nysgjerrigper 2-2017 

Sist endret: 01.06.2017

facebook twitter email print
  1. KULTUR OG HISTORIE
  2. KROPP OG HELSE
  3. SPRÅK OG TALL
  4. VERDENSROMMET
  5. HAV OG VANN
  6. DYR OG NATUR
  7. TEKNOLOGI
  8. MILJØ OG KLIMA
  9. Alle