Frisk med fisk
23. jan 2009 06:00
Foto: S. Halsetrønning/NN/SAMFOTO
Lakseoppdrettarane i Hardanger har mjuke hender. Så mjuke hender at forskarar har interessert seg for dei i jakta på ungdomskjelda.
Etter lange arbeidsdagar utan hanskar i iskaldt vatn har fiskeoppdrettarar i Hardanger framleis mjuke hender utan sprekker. Har dei funne ungdomskjelda blant fiskeyngelen?
Enzym
Forskarar har interessert seg for hendene til desse lakseoppdrettarane. Sannsynlegvis er det eit stoff hos fiskeyngelen som gir dei barske mennene mjuke barnefingrar. Medan fugleungar hakkar seg ut av skalet med nebbet, brukar fiskelarvar eit enzym som heiter zonase.
Enzym er kroppen sine bodbringarar, og for larvane er zonase som dynamitt å rekne! Det hjelper dei med å sprengje seg ut av egget. Zonase blir laga i ei hinne rundt plommesekken og bryt ned stoff (protein) i eggeskalet utan at fiskelarven blir skadd. Forskarane samanlikna eggeskalprotein og proteinet i huda til menneske. Dei fann store likskapar. Kunne zonase bli brukt til å behandle øydelagd hud hos menneske?
Enzym og protein
Proteina er kroppen sine byggjesteiner. Men av og til kan eit protein ha rolla som handverkar. Då blir det kalla eit enzym. Enzyma er signalstoff som fer omkring og får ting til skje, utan at dei sjølve blir brukte opp.
Hudsjukdommar
Zonase har ein utruleg eigenskap. Enzymet kan skilje mellom friske og døde hudceller. For mange med hudsjukdommar er dette svært viktig. Når dei skrubbar vekk døde hudceller yttarst, fjernar dei ofte dei nye, friske hudcellene i tillegg. Zonase bryt ned dei døde hudcellene, og let dei nye, friske cellene vere i fred.
Halde på vatnet
Enzymet treng vatn for å kunne verke. I vanleg fuktkrem fordampar vatnet raskt når ein smør kremen på huda. No jobbar forskarane med å få kremen til å halde på vatnet, slik at enzymet kan jobbe også etter at ein har smurt seg inn.
Publisert i Nysgjerrigper nr. 3-08
Sist endret: 23.01.2009