Iskald bankboks
17. jun 2007 23:00
Ein iskald "bankboks" på Svalbard skal bli lager for frø frå tre millionar matvareplantar frå heile verda. Frølageret gjer at bønder også i framtida kan så med rett type frø. Lageret blir bygd inne i fjellet rett utanfor Longyearbyen.
FOTO: Svein Holo/NN/Samfoto Før i tida vart det brukt svært mange forskjellige frø i landbruket. Slik er det ikkje lenger. I dag kjøper mange bønder frø med heilt like eigenskapar. Då er faren stor for at frøa til svært mange matplantar går tapt.
Klimaendringar
Problemet er: Skjer det endring i klimaet, må bøndene kanskje bruke andre typar frø. Det er derfor viktig å bevare matplantar med forskjellige eigenskapar. Då har også barnebarna dine dei beste sjansane til å dyrke mat.
Genbankar
I dag blir det lagra frø i lokale genbankar over heile verda. Problemet er kva som skjer viss ein genbank blir øydelagd i brann, krig eller naturkatastrofe. Då er frøa tapte. For å sikre plantane for etterkomarane byggjer Noreg eit sikkerheitslager for alle matfrøa i verda. Blir frøa øydelagde lokalt, kan genbankane kome og hente frøa sine på Svalbard.
Alltid minusgrader
Svalbard er svært eigna fordi det alltid er minusgrader i bakken. Nedfryste frø kan overleve i mange tiår. Alle frøa vil regelmessig bli testa og bytte ut. Då er ein sikker på at det alltid er nok frø med god kvalitet i frøbanken.
Gåve frå Noreg til verda
- Dette er ei gåve frå Noreg til det internasjonale samfunnet, fortel prosjektleiar Nina Due i Landbruks- og matdepartementet.
2007/08 er Det internasjonale polaråret. I neste utgåve av Nysgjerrigper følgjer det med eit vedlegg om polarforsking.
Publisert i Nysgjerrigper 2-07
Sist endret: 17.06.2007