Kjøttmeis strauk i gauktest
15. mai 2006 00:00
Gauken er kjend for å leggje egg i reiret til andre fuglar. Då norske forskarar plasserte egg frå kjøttmeis hos blåmeisa, gjekk det ikkje etter suksessoppskrifta til gauken.
Kjøttmeisa kan ikkje gjere som gauken: å leggje egg i reiret til andre fuglar. FOTO: JAN RABBEN/NN/SAMFOTO
Gauken er smart når han legg egga sine i andre fuglars reir. Då slepp han nemleg å bruke tid og krefter på å mate ungane sine.
I staden kan gauken bruke energien til å leggje fleire egg.
Snyltar
Fugleforskarar ved Universitetet i Oslo har lenge lurt på kvifor gauken er den einaste norske fuglen som snyltar. Kvifor gjer ikkje kjøttmeisa det same og legg egga sine hos blåmeisa? Blåmeisa er nemleg ofte borte frå reiret sitt. Det burde derfor vere lett for kjøttmeisa å leggje egg i blåmeisreir.
Testa kjøttmeis
Dette ville forskarane sjekke, og derfor tok dei den store gauktesten på kjøttmeisa. I eit skogsholt rett utanfor Oslo flytte dei kjøttmeisegg til blåmeisreir. Det første året gjekk det bra. Blåmeisene var kjempegode steforeldre. Kjøttmeisungane voks opp og hadde det kjempefint.
Kaotisk
Men året etter vart det kaos. Stebarn-kjøttmeisene song nemleg feil song - dei song akkurat som blåmeisa. Dei fleste av desse fuglane skjønte heller ikkje kven dei skulle pare seg med. Dei var så forvirra at dei prøvde å pare seg med blåmeis. Det gjekk ikkje så bra, for blåmeisene var lite interesserte i det. Så kjøttmeisene vart verande einslege og fekk verken familie eller ungar. Så konklusjonen er klar: Kjøttmeis strauk i gauktest.
Publisert i Nysgjerrigper nr. 2/2006
Sist endret: 15.05.2006